Maqneziumun hansı forması nəyə faydalıdır?
- 2024.05.31 19:00
- 823 Baxış
Maqnezium ürək ritmini və qan təzyiqini tənzimləyən, sümükləri möhkəm saxlayan və bədən funksiyaları üçün həyati əhəmiyyət kəsb edən bir mineraldır.
Bədəndə dördüncü ən bol kation olan maqnezium nazik bağırsaqlardan sorulur və böyrəklərdən xaric olur.
Medicina.az xəbər verir ki, əczaçı Ezgi Nevçehan müxtəlif formalarda olan maqneziumun sağlamlığa faydalarını izah edib.
İnsan bədəni maqnezium mineralını özü istehsal edə bilmədiyi üçün bu mineral mənbəyi qida və ya əczaçılıq əlavələri kimi vasitələrlə əldə edilməlidir.
"Maqnezium enerji istehsalı, qan təzyiqinin tənzimlənməsi, sinir siqnalının ötürülməsi də daxil olmaqla, insan sağlamlığı üçün vacib olan 300-dən çox metabolik reaksiyada iştirak edir. Bədənimizdə istifadə olunan maqneziumun demək olar ki, 60%-i dişlərdə və sümüklərdə, 39%-i isə yumşaq toxumalarda olur. Qanda isə 1% nisbətindədir. Maqnezium bədənimiz üçün son dərəcə vacib bir mineraldır və müxtəlif formalarda mövcuddur. Bu müxtəlif formaların hər birinin özünəməxsus sağlamlıq faydaları var", - deyə Ezgi Nevçehan bildirib.
Maqnezium Sitrat: Həzm sistemi tərəfindən asanlıqla əmilir və ümumiyyətlə həzm problemi olanlar tərəfindən seçilir. Sümük sağlamlığını dəstəkləyir və əzələ kramplarını azaldır.
Maqnezium Qlisinat: Maqneziumun ən yaxşı mənimsənilməsinə malikdir və anksiyete ilə stresi azaltmağa, yuxu keyfiyyətini yaxşılaşdırmağa və əzələ gərginliyini azaltmağa kömək edə bilər.
Maqnezium oksidi: Bağırsaq hərəkətliliyini artırır və qəbizliyi aradan qaldırır, lakin digər formalara nisbətən daha az sorulur.
Maqnezium L-treonat: Beyin funksiyalarını dəstəkləyir və sinir hüceyrələri arasında əlaqəni artıraraq yaddaş və konsentrasiyanı yaxşılaşdırır.
Maqnezium Taurat: Ürək sağlamlığını dəstəkləyir və ürək ritminin pozulmasını azaldır. Qan təzyiqini tənzimləyir, damarları rahatladır.
Maqnezium xlorid: Dəri vasitəsilə udularaq əzələ ağrılarını aradan qaldıra, stressi azalda və dəri sağlamlığını dəstəkləyə bilər.
Ezgi Nevçehan bildirib ki, maqnezium ehtiyacımızı həm əlavələrdən, həm də maqneziumla zəngin qidalar qəbul etməklə təmin edə bilərik:
“Bu qidalara balqabaq toxumu, badam, ispanaq, tam taxıl və lobya və s. daxildir. Adekvat maqnezium qəbulu sümük sağlamlığını dəstəkləyir, əzələ funksiyalarını tənzimləyir və sinir sistemi funksiyalarını yaxşılaşdırır”.
Maqnezium çatışmazlığının əzələ krampları, yuxululuq, yorğunluq, əsəbilik və nizamsız ürək döyüntüsü kimi əlamətlərə səbəb ola biləcəyini ifadə edən Nevçehan qeyd edib ki, bundan əlavə, uzun müddətli maqnezium çatışmazlığı osteoporoz, diabet, hipertoniya və ürək xəstəlikləri kimi ciddi sağlamlıq problemlərinə yol aça bilər.
Ezgi Nevçehan maqneziumun bədəndə hər zaman kafi miqdarda olmasının əhəmiyyətinə diqqət çəkib:
“Həddən az olması böyrəklərdə və qaraciyərdə, xüsusən də ürək və böyrəklərdə disfunksiyaya səbəb ola bilər. İnsanlar özlərini yorğun, zəif və narahat hiss edə bilərlər. Yuxu rejimi pozulur, yaddaş itkisi, kramplar, böyrək çatışmazlığı və öyrənmə çətinliyi kimi təsirlər yaranır. Bədəndə artıq maqnezium varsa, artıq miqdar bədən tərəfindən xaric edilə bilər. Orqanizmdə kalsium çatışmazlığı olduqda, artıq maqnezium meydana gəlir"
O, gündəlik ən uyğun maqnezium dozasını da xatırladıb:
"Normalda böyüklər gündə 300 mq maqneziuma ehtiyac duyurlar. İrəli yaşda bu miqdar 350 mq olmalıdır. Hamilə və süd verən qadınların maqneziuma ehtiyacı gündə təxminən 600 mq təşkil edir".
Aysel
Ən Çox Oxunanlar
Yeni Xəbərlər
