Xorultunu aradan qaldıran dərman istehsal olunacaq - YENİLİK

  • 2024.06.27 17:00
  • 745 Baxış
Xorultunu aradan qaldıran dərman istehsal olunacaq -  YENİLİK
ABŞ alimləri yeni bir dərman üzərində çalışırlar.

Medicina.az xəbər verir ki, həmin dərmanın tənəffüs və yuxu pozğunluqlarını yarıya endirəcəyi və xorultu problemini aradan qaldıra biləcəyi deyilir.

Sınaqlarda bir çox könüllüdə nəfəs darlığı və yuxu pozğunluğu kimi simptomların təxminən yarıya qədər azaldığı müşahidə edilib.

Ağır xorultu problemi zamanı da dərmanın çox təsirli olacağı proqnozlaşdırılır. Bu problemin müalicəsi üçün potensial daşıyan ilk dərmanın tənəffüs yollarındakı əzələləri gücləndirərək, toxumanın çökməsinin qarşısını alaraq və hava axınının qarşısının alınmasına mane olaraq təsir edəcəyi düşünülür.

Boğaz əzələləri yuxu zamanı rahatlaşdıqca ətrafdakı toxumalar daralır və ya tənəffüs yollarını bağlayır, bu da normal nəfəs almağa mane olur.

Yuxu apnesi yaşayan insanlar oksigen çatışmazlığı ilə üzləşirlər. Onlar gecə boyu on saniyə və ya daha çox davam edən təkrar edən fasilələrlə qarşılaşırlar. Simptomlara yüksək səsli xoruldama, səs-küylü və çətin nəfəs alma, gündüz yorğunluğu daxildir.

Yuxu apnesi yaşayanlar çox vaxt gecə baş verən nəfəs kəsintilərindən xəbərsiz olurlar. Müalicə olunmayan yuxu apnesi insult və ürək xəstəliyi riskini artıra bilər.

Yeni dərman bədəndə əzələlərin aktivləşməsinə və tonusuna təsir edəcək. Heyvanlar üzərində əvvəlki tədqiqatlar onların yuxarı tənəffüs yollarını açıq saxlamağa kömək edən dil əzələsinin gücləndiyini irəli sürmüşdü.

ABŞ-da aparılan araşdırmada isə yuxu apnesi olan 211 nəfərə dörd həftə ərzində gecələr qəbul etmələri üçün xoruldama əleyhinə həblər və “placebo” verilib. Daha sonra bədənə qoşulan sensorlar vasitəsilə yuxu zamanı beyin dalğaları, oksigen səviyyələri, ürək döyüntüləri və nəfəs alma ölçülüb.

Bu ilin əvvəlində “American Journal of Respiratory and Critical Care Medicine” jurnalında dərc edilən nəticələr göstərib ki, dörd həftədən sonra dərman qəbul edənlərin 44 faizində ümumi simptom göstəriciləri yarıdan çox azalıb.Könüllülərin bir çoxu saatda orta hesabla 45 yuxu pozğunluğu yaşasa da, bu rəqəm 10-dan aşağı düşüb. Gündüz yorğunluğu da azalıb və xəstəliyin digər təsirləri də nisbətən aradan qalxıb. Dərmanın ən diqqətçəkən əks təsiri isə ağız quruluğu olub.

Tapıntıları şərh edən Şeffild Universitetinin yuxu apnesi üzrə mütəxəssisi, professor Ceydip Rey deyib:

"Bu həb yuxu apnesi və xorultuya qarşı mübarizəmizdə inqilab edə bilər, lakin biz daha böyük sınaqların nəticələrini görməliyik".


Aysel