İsti hava təkcə tərləmir, iflic edir - Mütəxəssisdən beyin qanaması xəbərdarlığı
- 2026.07.24 22:14
- 105 Baxış
Türkiyəli professor Dr. Orhan Şen, isti havanın mənfi təsirlərinə diqqət çəkərək, yüksək təzyiq və ürək xəstəliyi olanlara xəbərdarlıq edib.
Medicina.az xəbər verir ki, beyin, sknir və onurğa beyni cərrahiyyəsi üzrə mütəxəssis professor Dr. Orhan Şen, hər gün artan istiliyin insan sağlamlığına mənfi təsirlərini vurğulayıb.
O, yüksək təzyiq və ürək xəstəliyi olanların həddindən artıq istilər zamanı daha diqqətli olmalı olduqlarını və beyin qanaması riski barədə xəbərdarlıq edib.
Bütün dünyanı təsir edən isti dalğası insan sağlamlığına da mənfi təsir göstərir. Saat 11:00 ilə 16:00 arasında günəş altında qalanlar daha böyük risk altındadır. Həddindən artıq isti hava birbaşa beyin qanamasına səbəb olmasa da, xüsusilə yüksək təzyiq, ürək və böyrək xəstəliyi olanlar üçün ciddi risk yaradır.
Professor Dr. Orhan Şen təkbaşına isti havanın beyin qanamasına səbəb olmadığını bildirərək deyib:
"İsti havada beyin qanaması keçirənlər adətən yüksək təzyiqli, ürək xəstəliyi olan, sidikqovucu dərman qəbul edən və kifayət qədər maye qəbul etməyən insanlardır. Susuzlaşma qanın özlülüyünü artırır. Bu, beyin damarlarında tıxanmalara, insult və qan təzyiqinin qəfil artması səbəbindən beyin qanamasına səbəb ola bilər".
İnsanların, xüsusən də günün ən isti saatlarında çölə çıxmaqdan çəkinməli olduqlarını vurğulayan Şen, "Mütləq zəruri olmadığı təqdirdə, saat 11:00 ilə 16:00 arasında günəş altında olmaqdan çəkinin. Açıq havada işləməli olanlar papaq, çətir və qoruyucu geyim geyinməlidirlər. Ən əsası isə bol su içməkdir. Həddindən artıq tərləmə ilə maye itkisi artdıqda qan qatılaşır və bu, beyinə və ürəyə ciddi yük yarada bilər" dedi.
Professor Dr. Şen qeyd edib ki, yüksək təzyiqli insanlar, qan durulaşdırıcı dərmanlar istifadə edənlər, irəliləmiş böyrək xəstəliyi olanlar və əvvəllər beyin anevrizması diaqnozu qoyulmuş insanlar daha da diqqətli olmalıdırlar. O, bu insanların uzun müddət günəş altında qalmaqdan çəkinməsinin və dərmanlarını müntəzəm olaraq qəbul etmələrinin vacib olduğunu vurğulayıb.
Beyin qanaması və insultunun erkən əlamətlərinə toxunan Şen bildirib:
"Danışma çətinliyi, üzün sallanması, qol və ya ayaqda güc itkisi, tarazlığın pozulması, yeriyərkən səndələmə, yuxululuq və stimullara yavaş reaksiya kimi simptomlar varsa, gecikmədən ən yaxın təcili yardım şöbəsinə getmək lazımdır. Erkən müdaxilə daimi zədələnmənin qarşısını almaqda böyük əhəmiyyət kəsb edir."
Professor Dr. Orhan Şen əlavə edib ki, isti havada görülən sadə tədbirlər ciddi sağlamlıq problemlərinin qarşısını ala bilər və vətəndaşlar, xüsusən də xroniki xəstəlikləri olanlar isti hava xəbərdarlıqlarına diqqət yetirməlidirlər.
Aygün
Medicina.az
Ən Çox Oxunanlar
Yeni Xəbərlər
