Xəstəyə hörmət edilmir - Tanınmış jurnalist özəl klinikaları tənqid etdi
- 2026.04.20 23:21
- 119 Baxış
Tanınmış jurnalist, Teleqraf Holdinqin rəhbəri Aynur Camal özəl klinikada üzləşdiyi vəziyyətlə bağlı kəskin tənqidi yazı ilə çıxış edib.
Medicina.az xəbər verir ki, o, gözlərindəki ağrılar səbəbindən əvvəlcədən randevu götürərək Baku Medical Plaza klinikasına müraciət etdiyini bildirib.
Jurnalist həmin klinikada çalışan oftalmoloq Emil Yusifovun qəbuluna yazıldığını qeyd edib.
Aynur Camalın sözlərinə görə, qəbul otağının qarşısında onlarla insan gözləyirmiş.
O, klinikada 2 saatdan artıq vaxt keçirdiyini, bunun cəmi 10-15 dəqiqəsinin həkim qəbulunda olduğunu bildirib. Müayinə tam başa çatmadan otaqdan çıxarıldığını və yenidən gözləməsinin istəndiyini vurğulayıb.
Yazının ən sərt hissəsində media rəhbəri özəl klinikalardakı bəzi yanaşmanı belə təsvir edib:
“Qabaqcadan müayinə üçün ödənişi alıblar, həkim də qazandığını qazanıb, klinika da. Pasiyentin canı cəhənnəmə…”
O bildirib ki, bəzi tibb müəssisələrində xəstənin sağlamlığı, əsəbi və vaxtı prioritet sayılmır, əsas diqqət isə ödənişin alınmasına yönəlir.
Aynur Camal yazısında sual edib ki, randevu sistemi varsa, niyə insanlar saatlarla gözlədilir, niyə normadan artıq pasiyent qəbul üçün yazılır və niyə xəstəyə elementar hörmət göstərilmir.
Qeyd edək ki, son dövrlər özəl klinikalarla bağlı oxşar narazılıqlar və xidmət keyfiyyəti ilə əlaqədar şikayətlər tez-tez gündəmə gəlir.
Elnur
Medicina.az
Ən Çox Oxunanlar
Yeni Xəbərlər
