Azərbaycanda ağır koronavirus xəstələrinə immun plazma köçürülməsinə başlandı- Donorlar anonimdir
- 2020.05.15 15:23
- 1176 Baxış
“Azərbaycanda kritik vəziyyətdə olan doqquz nəfər koronavirus xəstəsinə immun plazma köçürülüb”.
Medicina.az xəbər verir ki, bu barədə Milli Hematologiya və Transfuziologiya Mərkəzinin İcraçı direktoru Valeh Hüseynov “Xəzər Xəbər”ə açıqlamasında deyib.
O bildirib ki, koronavirus xəstələrinin qan plazması ilə müalicəsi çərçivəsində altı donordan immun plazma alınıb: “Bu günə qədər Milli Hematologiya və Transfuziologiya Mərkəzində koronavirus infeskiyasından sağalan altı nəfər donordan immun plazma toplanıb. Bu plazmalar kritik-ağır vəziyyətdə olan doqquz nəfər koronavirus xəstəsinə köçürülüb. Onlar yaşlı, paralel xəstəlikləri olan və süni tənəffüs aparatına qoşulan xəstələrdir. Həmin insanlar ciddi həkim nəzarətində saxlanılır, ehtiyac olarsa, onlara yenidən immun plazma köçürülə bilər”.
V.Hüseynov donorların anonimliyinin qorunduğunu bildirib: “Koronavirus infeksiyasından sağalan şəxslərin qan plazmaları verməsinə ehtiyac var. Donorların anonimliyi mütləq şəkildə qorunur. Onların plazma nümunələri ağır vəziyyətdə olan COVİD-19 xəstələrinin sağalmasını sürətləndirə bilər. Müalicə metodu səmərəli olarsa, gələcəkdə koronavirusa yoluxan şəxslərin müalicəsinin ilkin mərhələsində də bu üsul tətbiq olunacaq”.
Ən Çox Oxunanlar
Yeni Xəbərlər
