Azərbaycanda ilk dəfə - Küvezdə 600 qramlıq körpədə ürək əməliyyatı
- 2021.04.18 13:30
- 2075 Baxış
Medicina.az xəbər verir ki, Mərkəzi Klinikaya digər xəstəxanada doğulmuş 23-24 həftəlik, 600 qram çəki ilə, həyatının ilk sutkasında çox ağır vəziyyətdə olan körpə təxliyə olunub. Daxil olarkən ümumi vəziyyəti ağır olan, ekstremal az çəkili, respirator disstres sindromlu, erkən neonatal sepsis diaqnozu qoyulmuş körpənin Neonatal reanimasiyada süni tənəffüs cihazında müşahidəsinə başlanılıb. Müayinə zamanı geniş PDA (Patent Doctus Arteriosus) aşkarlanıb.
Mərkəzi Klinikanın baş həkimi ürək-damar cərrahı Kamran Musayev və klinikanın digər həkimləri tərəfindən Azərbaycanda ilk dəfə küvez içində 600 qram körpədə yataqbaşında PDA ləğvi əməliyyatı uğurla icra olunub.
Beləliklə, körpə süni tənəffüs cihazından ayrılıb. Vaxtından əvvəl doğulmanın yaratdığı qida intoleransı, metabolik, tənəffüs pozuntusu kimi problemlər aradan qaldırılıb.
Uşaqda ROP müayinəsi aparılıb, aşkarlanan problemlər vaxtında korreksiya olunub, hazırda körpənin görməsində heç bir problem yoxdur.
Körpə artıq 1780 qram çəkidədir və sağ-salamat evinə yola salınıb.
Qeyd edək ki, körpənin sağlamlığına qovuşmasında Ürək-damar cərrahiyə şöbəsi, başda professor Kamran Musayev olmaqla, Pediatriya şöbəsinin müdiri, neonatoloq, t.ü.f.d Sevda Əsədovanın, Pediatriya şöbəsinin professional həkim və tibb bacılarından ibarət olan Neonatologiya reanimasiya və intensiv terapiya bölməsinin, eləcə də Əməliyyatxana və anesteziologiya şöbəsinin müdiri, t.ü.f.d Asəf Məmmədovun böyük əməyi olub.
Ən Çox Oxunanlar
Yeni Xəbərlər
