Həddindən artıq qəhvə sağlamlığa necə təsir edir?
- 2026.07.09 17:35
- 236 Baxış
Bu gün qəhvə bir çox insan üçün əvəzolunmaz vərdişə çevrilib.
Medicina.az xəbər verir ki, gündəlik həyatın intensiv tempi səbəbindən neçə fincan qəhvə içdiyini hesablamayanların sayı az deyil.
Bəs həddindən artıq qəhvə istehlakı orqanizmə necə təsir edir?
Mütəxəssislərin sözlərinə görə, qəhvə təkbaşına zərərli içki deyil. Əksinə, düzgün miqdarda və düzgün şəkildə qəbul edildikdə sağlamlıq üçün mühüm faydalar təmin edə bilər.
Qəhvənin əsas təsiri tərkibindəki kofeinlə bağlıdır. Kofein beyində yorğunluq hissi yaradan reseptorları müvəqqəti olaraq bloklayır və insan özünü daha ayıq, enerjili və diqqətli hiss edir. Lakin kofein əsl yorğunluğu aradan qaldırmır, sadəcə onu bir müddət gecikdirir. Gün ərzində getdikcə daha çox qəhvə içmək ehtiyacı hiss olunursa, bunun səbəbi çox vaxt yuxusuzluq, xroniki stress, nizamsız qidalanma və ya ağır iş rejimi olur.
Araşdırmalara görə, gündə 3–5 fincan şəkərsiz qəhvə içən insanlarda ürək-damar xəstəlikləri, 2-ci tip diabet, insult, demensiya və bəzi xərçəng növlərinin yaranma riski daha aşağı ola bilər.
Mütəxəssislərin fikrincə, qəhvənin tərkibindəki antioksidantlar və digər bioloji aktiv maddələr iltihabı azaltmağa, insulinə həssaslığı artırmağa və beyin funksiyalarını dəstəkləməyə kömək edir.
Bununla yanaşı, gündə 2–3 fincan kofeinli qəhvə qəbulunun idrak qabiliyyətinin zəifləməsini ləngidə biləcəyi də bildirilir. Faydalı təsir əsasən şəkərsiz və qatqısız qəhvəyə aiddir. Şəkərli, şərbətli və qaymaqlı hazır qəhvə içkiləri yüksək kalori və əlavə şəkər ehtiva etdiyindən sağlamlığa mənfi təsir göstərə bilər.
Mütəxəssislər gündə təxminən 3–4 fincan qəhvənin təhlükəsiz hesab olunduğunu, daha çox istehlakın isə ürəkdöyünmə, narahatlıq, yuxu pozğunluğu və mədə problemlərinə səbəb ola biləcəyini vurğulayırlar.
Xanım,
Medicina.az
Ən Çox Oxunanlar
Yeni Xəbərlər
