Mədəaltı vəz xəstəliklərindən xəbər verən 5 əlamət
- 2026.07.30 12:15
- 243 Baxış
Mədəaltı vəzi orqanizmdə həzm və qan şəkərinin tənzimlənməsində mühüm rol oynayır. Lakin bu orqanda yaranan problemlər, xüsusilə də pankreatit və mədəaltı vəzi xərçəngi, ilkin mərhələdə az əlamətlə özünü göstərə bilər.
Medicina.az xəbər verir ki, mütəxəssislər aşağıdakı simptomlara diqqət yetirməyi tövsiyə edirlər:
1. Qarının yuxarı hissəsində davamlı ağrı
Ağrı bel nahiyəsinə yayıla bilər. Uzun müddət davam edən və ya güclənən ağrılar həkim müayinəsi tələb edir.
2. Səbəbsiz sarılıq
Dərinin və gözlərin saralması, sidiyin tündləşməsi və nəcisin açıq rəng alması öd yollarında problemə işarə edə bilər.
3. Səbəbsiz çəki itkisi və güclü yorğunluq
Qidalanma və həyat tərzi dəyişmədən arıqlamaq, iştahasızlıq və uzunmüddətli halsızlıq diqqətdən kənarda qalmamalıdır.
4. Davamlı həzm problemləri
Şişkinlik, ürəkbulanma, təkrarlanan ishal və yağlı, çətin xaric olunan nəcis mədəaltı vəz fəaliyyətinin pozulması ilə bağlı ola bilər.
5. Qəfil yaranan diabet
Heç bir aydın səbəb olmadan yaranan və ya nəzarəti çətinləşən diabet bəzi hallarda mədəaltı vəz problemlərinin əlaməti ola bilər.
Mütəxəssislər bildirirlər ki, bu əlamətlər mütləq xərçəng demək deyil, lakin uzun müddət davam etdikdə və ya bir neçə simptom birlikdə müşahidə olunduqda həkimə müraciət etmək vacibdir. Mədəaltı vəzin sağlamlığını qorumaq üçün siqaretdən uzaq durmaq, alkoqolu məhdudlaşdırmaq, düzgün qidalanmaq və aktiv həyat tərzi tövsiyə olunur.
Xanım,
Medicina.az
Ən Çox Oxunanlar
Yeni Xəbərlər
