Əməliyyatdan sonra ölən xəstə ilə bağlı RƏSMİ AÇIQLAMA
- 2025.11.04 17:25
- 81 Baxış
Lənkəran sakininin xəstəxanada ölməsi faktı ilə bağlı araşdırma aparılır.
"Medicina" xəbər verir ki, Baş Prokurorluğun məlumatında deyilir.
"Daxil olmuş sorğulara cavab olaraq bildirilir ki, Lənkəran Rayon Mərkəzi Xəstəxanasında "sol tərəfi boğulmuş qasıq yırtığı diaqnozu" ilə cərrahi əməliyyat olunmuş 1965-ci il təvəllüdlü Siyavuş Rzayevin noyabrın 4-də həmin xəstəxanada vəfat etməsi faktı üzrə rayon prokurorluğunda araşdırma aparılır".
Belə ki, oktyabrın 28-də Lənkəran Rayon Mərkəzi Xəstəxanasına yırtıq problemi ilə daxil olan Lənkəran şəhər sakini, 1965-ci il təvəllüdlü Siyavuş Rzayev əməliyyata götürülüb.
S.Rzayevin yoldaşı Azadə Rzayevanın sözlərinə görə, əməliyyatdan sonra yoldaşı özünü pis hiss edib. Onların iddiasına görə, S.Rzayev həkim səhlənkarlığının qurbanı olub.
"Həkim yoldaşımın bağırsağını deşib və buna görə onun qarnı şişib, zəhərlənmə verib. Xəstəxananın o biri həkimləri əllərindən gələni etdilər və 2 gün bundan əvvəl yoldaşımı yenidən əməliyyata saldılar. Artıq gec olduğundan yoldaşımın həyatını xilas edə bilmədilər",- deyə A. Rzayeva bildirib.
Meyit müayinə olunması üçün Məhkəmə Tibbi Ekspertiza və Patoloji Anatomiya Birliyinin Lənkəran rayonlararası zona mərkəzinə təhvil verilib.
medicina.az
Ən Çox Oxunanlar
Yeni Xəbərlər
