Evdə koronavirus xəstəsinə necə qulluq etməli? - Tövsiyələr
- 2021.09.11 15:53
- 1727 Baxış
Koronavirusa yoluxan xəstə evdə müalicə alırsa, o, ayrı otaqda saxlanılmalıdır.
Türkiyənin Səhiyyə Nazirliyinin yaydığı tövsiyə məktubunda koronavirusu yüngül keçirən xəstələrə baxım şərtləri açıqlanıb.
Medicina.az xəbər verir ki, ev və əl təmizliyinə xüsusi diqqət ayrılmasının vacibliyi vurğulanıb. Bundan başqa, səhhətində problem olan, o cümlədən immuniteti zəif və yaşlı insanlar həmin evdə qalmamalıdır.
Evə yad adamların, qohumların gəlişi, qonaq qəbulu yolverilməzdir.
Xəstəyə baxan ailə üzvü onun dərmanlarını vaxtlı-vaxtında qəbul etməsinə, asqırma və öskürmə zamanı birdəfəlik kağız dəsmaldan istifadə etməsinə, əl gigiyenasına diqqət göstərməli, onun istirahət etməsini, bol miqdarda maye qəbulunu, yeməyini vaxtlı-vaxtında yeməsini təmin etməli, nəfəs almada problem yarandıqda isə təcili yardıma xəbər verməlidir.
Ailə üzvləri ilə eyni otaqda olduqda tibbi maska taxılmalı, əl və üzə toxunulmamalı, otaqdan çıxdıqda isə dərhal maska atılmalı və əllər yuyulmalıdır.
Mümkün olduğu qədər xəstə ayrı ayaqyolu və hamamdan istifadə etməlidir.
Xəstənin tez-tez toxunduğu, təmas etdiyi yerlər gündə azı bir dəfə sabunlu və ya yuyucu toz olan su ilə təmizlənməli, xüsusi məhlul ilə dezinfeksiya edilməlidir.
Xəbərdarlıqda xəstə baxıcılarına öz səhhətlərində baş verən dəyişiklikləri də diqqətdə saxlamaları tövsiyə olunub.
Ən Çox Oxunanlar
Yeni Xəbərlər
