Dünyaca məşhur alim Mehmet Haberal TƏBİB sədri ilə görüşdü

  • 04 İyn 2022 15:34
  • 838 Baxış
Dünyaca məşhur alim Mehmet Haberal TƏBİB sədri ilə görüşdü

Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədri vəzifəsini icra edən Vüqar Qurbanov Başkənd Universitetinin qurucusu və rektoru, Dünya Orqan Transplantasiyası Dərnəyinin prezidenti, akademik Mehmet Haberalla görüşüb.



Medicina.az xəbər verir ki, görüşdə birgə təcrübə mübadiləsi, tibbi personalın bilik və bacarıqlarının artırılması üçün effektiv kursların təşkili, tibb işçilərinin tədqiqatlara təşviq olunması, əməkdaşlıq memorandumunun imzalanması və sair kimi məsələlər müzakirə olunub.

Vüqar Qurbanov dünyaşöhrətli alimi TƏBİB-də görməkdən məmnunluğunu ifadə edib. O, Azərbaycanda tibbi xidmətin keyfiyyətinin artırılması, səhiyyə sistemində yeni təmayüllərin yaradılması üçün belə görüşlərin mühüm əhəmiyyət kəsb etdiyini vurğulayıb. O, tibbi xidmətin təşkili üzrə vətəndaş məmnunluğunun artırılmasında Türkiyə təcrübəsinin əhəmiyyətli rol oynadığını bildirib.


Mehmet Haberal isə öz növbəsində rəhbərlik etdiyi Başkənd Universitetinin qardaş ölkənin səhiyyə sisteminə töhfə verməkdən məmnun olacağını ifadə edib. M.Haberal tibbi personal üçün təcrübi təlimlərin keçirilməsində yaxından iştirak edəcəklərini və bütün mümkün dəstəyi göstərəcəklərini bildirib.

Daha sonra tərəflər arasında qarşılıqlı əməkdaşlıq imkanları barədə geniş fikir mübadiləsi aparılıb.