Gizli şəkər nədir və necə başlayır?
- 2026.07.08 20:30
- 108 Baxış
Gizli şəkər (prediabet) qan şəkərinin normadan yüksək, lakin hələ şəkərli diabet diaqnozu qoyulacaq qədər yüksək olmadığı vəziyyətdir.
Bu dövrdə orqanizm artıq insulinə əvvəlki kimi cavab vermir və qanda qlükozanın səviyyəsi tədricən yüksəlməyə başlayır.
Medicina.az xəbər verir ki, bir çox insan bu vəziyyətə yalnız təsadüfi analiz zamanı və ya artıq şəkərli diabet inkişaf etdikdən sonra diaqnoz qoyulduğunu öyrənir.
Adətən proses insulin müqaviməti ilə başlayır. Mədəaltı vəzi qanda şəkəri normal saxlamaq üçün daha çox insulin ifraz edir. Bir müddət bu mexanizm işləyir, lakin zaman keçdikcə orqanizm insulinə daha zəif cavab verir və qan şəkəri yüksəlməyə başlayır.
Bu mərhələdə insan özünü sağlam hesab edə bilər, amma orqanizmdə dəyişikliklər artıq başlayıb.
İlk əlamətlər hansılardır?
Aşağıdakı əlamətlər gizli şəkərin xəbərçisi ola bilər:
Yeməkdən sonra güclü yuxululuq
Tez-tez şirin qida istəyi
Qarın nahiyəsində piylənmə
Daimi yorğunluq və halsızlıq
Səbəbsiz kökəlmə və ya arıqlaya bilməmək
Tez-tez aclıq hissi
Susuzluğun artması
Gecələr sidiyə daha çox çıxmaq
Boyun arxası və qoltuqaltında dərinin qaralması
Görmənin müvəqqəti bulanıqlaşması
Kimlər risk altındadır?
Artıq çəkisi olanlar
Hərəkətsiz həyat tərzi keçirənlər
Ailəsində şəkərli diabet olanlar
Yüksək təzyiq və ya yüksək xolesterini olanlar
45 yaşdan yuxarı şəxslər
Qadınlarda hamiləlik şəkəri keçirmiş və ya polikistik yumurtalıq sindromu olanlar.
Gizli şəkəri aşkar etmək üçün həkim aşağıdakı analizləri tövsiyə edə bilər:
Aclıq qan şəkəri.
HbA1c (son 2–3 ayın orta qan şəkəri göstəricisi).
Qlükoza tolerantlıq testi (şəkər yüklənmə testi).
Lazım olduqda insulin səviyyəsi və insulin müqavimətinin qiymətləndirilməsi.
Gizli şəkər vaxtında aşkar edilərsə, bir çox insanda sağlam qidalanma, müntəzəm fiziki aktivlik, artıq çəkinin azaldılması və həyat tərzi dəyişiklikləri ilə qan şəkəri normal həddə qayıda bilər. Vaxtında tədbir görülməzsə isə bu vəziyyət zamanla şəkərli diabetə çevrilə bilər.
Aygün Musayeva
Ən Çox Oxunanlar
Yeni Xəbərlər
