Sabirabadda nə baş verir? -- Dializ alan xəstələrdən ikisi öldü
- 2020.01.25 15:50
- 4452 Baxış
Sabirabad Rayon Mərkəzi Xəstəxanasının dializ şöbəsində dializ aldıqdan sonra zəhərlənmiş xəstələrdən ikisi vəfat edib. Dünən bu xəstəxanada dializ aldıqdan sonra 5 nəfərin vəziyyətinin pisləşdiyi barədə məlumat verilmişdi.
Medicina.az ayna.az-a istinadən bildirir ki, Saatlı rayon sakini Ağayev Əlisa Mahmud oğlu bu gün axşam saatlarında keçinib. O, dünən Sabirabadda dializ alıb.
“Dünən səhər onu dializə apardıq, qayıdanda özünü yaxşı hiss etmirdi. Evə gətirəndən sonra daha da ağırlaşdı, yenidən xəstəxanaya qaytardıq, tibbi yardım göstərdilər, axşam evə gətirdik. Ancaq vəziyyəti yaxşı deyildi deyə, bu səhər yenidən xəstəxanaya apardıq, yarım saat dializ aldı, gətirdik evə. Bir az olar ki, vəfat etdi”.
Faktı Ə.Ağayevin oğlu Vasif Ağayev də təsdiq etdi: “Bir saat olar ki, atamı itirdik. Xəstəxanaya gəlin, araşdırın, görün, orda nələr baş verir. Xəstələrin birini Bakıya aparmışdılar, o da orda keçinib, qaytarıblar geri”.
Sabirabad Rayon Mərkəzi Xəstəxanasının baş həkimi Ənvər Lümanov da AYNA-ya açıqlamasında, Bakıya göndərilən xəstənin vəfat etdiyini təsdiqlədi:
“Sizə dedim axı, o xəstənin mədəsində xroniki yazva var idi deyə, qanaxma baş vermişdi və Bakıya göndərmişdik. Bakıda rəhmətə getdi, buradan təcili yardım göndərdim, gətirdilər. Siz dediyiniz barədə isə məlumatım yoxdur, indi dəqiqləşdirəcəm”.
Təəsüflər olsun ki, baş həkim növbəti zənglərimizə cavab vermədi. Ancaq xəstələrin yaxınlarından öyrəndik ki, Bakıyda göndərilmiş xəstə Sabirabad rayon sakini Soltanov Füzuli Soltan oğlu olub. Digər xəstələrin isə vəziyyətinin ağır olaraq qaldığı bildirildi. Xəstə qohumlarının dediyinə görə, əgər sabah səhərə qədər xəstələrin vəziyyətlərində irəliləyiş olmasa, Bakıya gətirəcəklər.
Qeyd edək ki, dünən Sabirabad Rayon Mərkəzi Xəstəxanasının dializ şöbəsində dializ alan xəstələr zəhərləniblər və xəstəxananın reanimasiya şöbəsinə yerləşdiriliblər.
Ən Çox Oxunanlar
Yeni Xəbərlər
